Hakim Ziyech është duke kaluar nëpër një formë të mrekullueshme këtë edicion me Ajaxin.
Mesfushori maroken është ndër më meritorët që skuadra e tij është në mesin e katër ekipeve më të mira në Evropë si dhe po lufton për titullin e kampionit në Ereidivisie.
26-vjeçari falë formës së mirë që është duke kaluar, ka zgjuar interesimin e skuadrave të mëdha evropiane.
Bayern Munich, Borussia Dortmund, Arsenal, Chelsea dhe Roma janë ekipet që po e duan marokenin.
“Për mendimin tim jam duke kaluar sezonin më të mirë në karrierë deri më tani. Më pëlqen ta ndihmojë skuadrën dhe t’i arrijmë së bashku objektivat”, tha Ziyech.
Reprezentuesi i Marokut ka thënë se është herët për të folur për skuadrën e ardhshme, por pranon se në verë mund të ndërrojë kampionat.
“Gjithçka është e mundur deri në verë. Aktualisht jam i fokusuar që t’i arrijmë objektivat me Ajaxin”.
“Por për ta lënë Ajaxin duhet të vijë një klub i mirë dhe me një projekt serioz për të më bindur”, u shpreh Ziyech.
Mesfushori ofensivë këtë edicion ka zhvilluar 42 ndeshje zyrtare ku ka shënuar 19 gola dhe ka asistuar në 20 të tjerë. /Telegrafi/