Një ish-ushtar britanik ka vdekur gjatë luftimeve me forcat ruse në qytetin Sievierodonetsk, ka bërë të ditur familja e tij, shkruan The Guardian.
Jordan Gatley në mars e la ushtrinë britanike për të vazhduar karrierën e tij si ushtar në zona tjera, dhe se kishte ndihmuar trupat ukrainase për të mbrojtur vendin e tyre nga Rusia, shkroi në një postim gjatë së shtunës në rrjetin social Facebook babai i tij Dean.
“Dje me datë 10 qershor 2022 e morëm lajmin e dhimbshëm se djali ynë Jordan, u vra në qytetin Sievierodonetsk të Ukrainës, ai e donte punën që e bënte dhe ne jemi shumë krenar për të. Ai ishte një hero i vërtetë dhe do të jetë gjithmonë në zemrat tona”, shkruhej në postim, transmeton Telegrafi.
Gatley vdiq në betejën për qytetin strategjik në rajonin lindor të Donbas në Ukrainë, qytet në të cilin ditëve të fundit po zhvillohen luftime intensive.
Mendohet se Gatley është britaniku i dytë i cili është vrarë gjatë luftës në Ukrainë.
Gjatë muajit prill u bënë homazhe për Scott Sibley, një veteran i ushtrisë britanike, për të cilin besohet se vdiq duke luftuar kundër trupave ruse.
“Kemi marrë disa mesazhe nga ekipi i tij në Ukrainë, të cilët na tregonin për njohuritë dhe aftësitë e tij si ushtar dhe dashurinë e tij për punën që ai e bënte”, shkruhej tutje në deklaratën e familjes Gatley. /Telegrafi/