Arben Vitia, kandidat për kryetar të Prishtinës nga Lëvizja Vetëvendosje në një intervistë në “Përballje” në Telegrafi, ka folur për kandidaturën e tij, projektet dhe synimet që ai ka nëse zgjidhet si kryetar i kryeqytetit në garën e balotazhit që do të mbahet me 14 nëntor 2021.
Ai në këtë intervistë ka folur për zgjidhjen e problemit të mungesës së shkollave në disa lagje dhe mbingarkesës me nxënës të shkollave në lagje tjera.
Kandidati i LVV-së thotë se investimet në shkolla do të jenë të barabarta për secilën lagje.
“Prishtina do të jetë qytet policentrik, por unik. Në veçanti janë disa lagje ku kemi problem me shkolla. Është lagjja “Prishtina e re” që ka një ekspansion të madh të qytetarëve që nga paslufta dhe ende nuk kemi ndonjë shkollë. Kemi lagjen “Mati 1” që poashtu kemi ekspansion të jashtëzakonshëm të ardhjeve dhe kemi vetëm shkollën “Pavarësia” që as për së afërmi nuk i plotëson nevojat e lagjes… I njëjti problem është edhe në lagjen “Kalabaria”. Edhe në lagjen “Sofalia” poashtu mungon një shkollë dhe problemi i njëjtë është edhe në lagjen “Arbëria””, ka deklaruar ai në Përballje transmeton Telegrafi.
Vitia thotë se këto shkolla kanë qenë në projekt por nuk janë kryer, megjithatë thotë se në mandatin e tij nuk do të lejohen këto gjëra.
“Në mandatin tim që nga fillimi nuk do të lejojë që të ketë projekte të riciklueshme në tavolinën e kryetarit të komunës. Nëse një projekt sillet në tavolinën e kryetarit me muaj, ky është problem edhe për projektet tjera të cilat duhet të kryhen në kohën e njëjtë”.
Kandidati i LVV-së thotë se mungesa e shkollave në këto lagje krijojnë probleme të shumëfishta.
“Për shkak të distancës gjeografike, rrezikohen fëmijët që kalojnë nga një lagje në lagjen tjetër, dhe nga ana tjetër mbingarkohen shkollat e lagjeve tjera…Këto pesë shkolla do të fillojnë menjëherë të ndërtohen dhe do të përfundohen brenda mandatit”, tha ndër të tjera Arben Vitia./Telegrafi/