Ministri i Punëve të Brendshme, Agim Veliu gjatë raportimit të tij në Kuvendin e Kosovës, në lidhje me incidentin në Karaçevë, tha se kjo pikë kufitare nga viti 2008 është shkelur 19 herë.
Veliu përsëriti se mandati i sigurisë me kufirin me Serbinë i takon KFOR-in.
“Duhet ta keni të qartë nëse nuk e keni dëgjuar fjalimin tim, se mandati i sigurisë me kufirin me Serbinë është ende mandat i KFOR-it. Sa për informacionin tuaj, incidenti në këtë vijë kufitare nuk është i vetmi. Prej 1 janarit 2008, deri më 14 gusht 2020, janë raportuar 19 raste të tilla të shkeljeve të dnryshme që janë bërë në atë pjesë të kufirit. Nuk e kam ndërmend me u strukë. Sa i përket çështjes së shkarkimit. Zotëri Selimi po ta theksoj edhe njëherë më ka shkarkue, por jeni shkarkue të gjithë”, tha Veliu.
Në fillim të muajit gusht të këtij viti, banorët e fshatit Karaçevë të Kamenicës janë shprehur tejet të brengosur, për faktin se nëpër parkingun e një restoranti të këtij fshati janë parë dhe filmuar pjesëtarët e xhandarmerisë serbe duke kaluar.
Lëvizja Vetëvendosje ka thirrur në interpelancë ministrin e Punëve të Brendshme, Agim Veliu në lidhje me këtë incident, i cili nxiti reagime të shumta dhe shqetësim të banorëve. /Telegrafi/