Një gjeneral rus është vrarë në luftimet rreth Kharkiv, ka pohuar inteligjenca ukrainase, gjë që do ta bënte atë gjeneralin e dytë që ushtria ruse ka humbur në Ukrainë brenda një jave.
Sipas The Guardian, përcjell Telegrafi, krahu i inteligjencës i ministrisë së mbrojtjes ukrainase tha se gjeneralmajor Vitaly Gerasimov, shefi i shtabit të Ushtrisë së 41-të, ishte vrarë jashtë qytetit lindor të Ukrainës, Kharkiv, së bashku me oficerë të tjerë të lartë.
Ministria transmetoi gjithashtu atë që pretendoi se ishte një bisedë midis dy oficerëve rusë të FSB-së që diskutonin vdekjen dhe ankoheshin se komunikimet e tyre të sigurta nuk funksiononin më brenda Ukrainës.
Agjencia e gazetarisë investigative Bellingcat tha se kishte konfirmuar vdekjen e Gerasimov me një burim rus.
Drejtori ekzekutiv i saj, Christo Grozev, tha se ata kishin identifikuar gjithashtu oficerin e lartë të FSB-së në bisedën e përgjuar.
Gerasimov mori pjesë në luftën e dytë çeçene, në operacionin ushtarak rus në Siri dhe në aneksimin e Krimesë, duke fituar medalje nga ato fushata.
Nëse konfirmohet, Gerasimov do të jetë gjenerali i dytë rus që vritet brenda një jave në agresionin e Ukrainës nga Vladimir Putin.
Në fillim të marsit, zëvendëskomandanti i saj, gjeneralmajor Andrei Sukhovetsky, u konfirmua nga mediat ruse se ishte vrarë. /Telegrafi/