Një i ri i moshës rreth 17-vjeçare ka vdekur pasi është vetaksidentuar sot me motoçikletë në rrugën Prishtinë-Pejë, konkretisht në fshatin Qyshk.
Lajmin për Telegrafin e konfirmoi zëdhënësi i Policisë së Kosovës për rajonin e Pejës, Fadil Gashi.
Ai bëri të ditur se bashkë me viktimën në motoçikletë ka qenë edhe një pasagjer i moshës rreth 19-vjeçare, i cili është dërguar në Spitalin Rajonal të Pejës, për shkak të lëndimeve të marra.
“Rreth orës 15:25 policia është informuar se një aksident trafiku ka ndodhur në rrugën Prishtinë-Pejë, konkretisht në fshatin Qyshk. Në aksident është përfshirë një motoçikletë me dy persona, ku gjatë lëvizjes shoferi i motoçikletës ka humbur kontrollin dhe ka goditur një shtyllë betoni. Si pasojë ka ndërruar jetë shoferi i motoçikletës i moshës rreth 17-vjeçare dhe është lënduar pasagjeri i moshës rreth 19-vjeçare”.
“Policia dhe autoambulanca kanë dalë në vendin e ngjarjes, ndërsa vdekjen e viktimës e ka konfirmuar mjeku i emergjencës. Pasagjeri i lënduar është dërguar në Spitalin Rajonal të Pejës për shkak të lëndimeve të marra”, deklaroi Gashi.
Tutje, ai tha se Prokurori i Shtetit ka urdhëruar që trupi i pajetë të dërgohet në Institutin e Mjekësisë Ligjore për obduksion. /Telegrafi/