Viti 2021 ka qenë një vit shumë aktivë sa i përket futbollistëve shqiptarë, pasi shumë prej tyre kanë kryer transferime gjatë këtij viti kalendarik.
Një nga transferimet më të mëdha ishte padyshim ai i Xherdan Shaqirit, i cili u largua nga Liverpooli për tu bashkuar me gjigantin francez Olympique Lyon.
Milot Rashica u largua nga Werder Bremeni për tu transferuar në Ligën Premier tek skuadra Norwich City.
Në Francë shkoi edhe Elbasan Rashani, që pas shkëlqimit me Erzurumin në Superligën e Turqisë, u bashkua me skuadrën franceze Clermont ku ka filluar të lë gjurmë me gola e asistime.
Futbollistët shqiptarë ndryshuan skuadra edhe në elitën e futbollit italian, Serie A.
Pas një viti të kaluar në Serie B me Spalin, Etrit Berisha u rikthye në elitën e futbollit italian përsëri, duke nënshkruar me skuadrën e madhe italiane Torino.
Elseid Hysaj u largua pas disa viteve nga Napoli dhe u transferua në kryeqytet te Lazio, derisa skuadër në Itali ndryshoi edhe Ardian Ismajli që la Spezian për Empolin. Te Empoli u transferua edhe portieri i Përfaqësueses së Kosovës, Samir Ujkani.
Armando Broja u rikthye te Chelsea pas huazimit të suksesshëm te Video, por kampionët e Evropës e dërguan atë përsëri në huazim dhe kësaj radhe në Ligën Premier te Southampton.
E nga Liga Premier u largua Andi Zeqiri për tu huazuar në elitën e futbollit gjerman Bundesliga te Augsburg.
Shkodran Mustafi pasi qëndroi disa muaj pa skuadër, në fund u rikthye në La Liga ku ka nënshkruar me Levanten.
Interesant sa i përket transferimeve të shqiptarëve ka qenë edhe elita e futbollit në Turqi. Portieri i Përfaqësueses së Kosovës, Arijanet Muric u huazua nga Manchester City te Adana në Superligën turke, derisa Endri Çekiçi iu bashkua Zymer Bytyqit e Sokol Cikalleshit te Konyaspori.
Mërgim Berisha la Red Bull Salzburgun për Fenerbahcen, derisa në Turqi u rikthye edhe Herolind Shala që i është bashkuar Erzurumsporit.
Telegrafi më poshtë sjell disa nga transferimet e futbollistëve shqiptarë që ndodhën gjatë vitit 2021:
Xherdan Shaqiri, Liverpool —> Lyon
Milot Rashica, Werder Bremen —> Norwich City
Armando Broja, Chelsea —> Southampton
Andi Zeqiri, Brighton —> Augsburg
Arijanet Muric, Man City —> Adana
Lirim Kastrati, Dinamo Zagreb —> Legia
Shkodran Mustafi, Schalke 04 —> Levante
Etrit Berisha, Spal —> Torino
Amir Abrashi, Freiburg —> Grasshoppers
Mërgim Berisha, RB Salzburg —> Fenerbahce
Ardian Ismajli, Spezia —> Empoli
Samir Ujkani, Torino —> Empoli
Elbasan Rashani, Erzurum —> Clermont
Herolind Shala, Stabaek —> Erzurum
Besar Halimi – Sandhausen —> Riga
Elseid Hysaj, Napoli —> Lazio
Endri Çekiçi, Ankargucu —> Konyaspor
Toni Domgjoni, Zurich —> Vitesse