Trajneri i Juventusit, Massimiliano Allegri, është kapur nga kamerat duke e quajtur Leonardo Bonuccin ‘budalla’ dhe duke e sharë gjatë një zënke ndërmjet dyshes, në ndeshjen kundër Palermos.
Zonja e Vjetër e pati kontrollin e plotë në atë takim, të cilin e fitoi me rezultat 4-1, mirëpo mes trajnerit dhe mbrojtësit pati tensione.
Bonucci kishte reaguar me nervozizëm ndaj Allegrit në momentin e zëvendësimeve në minutat e fundit të takimit, ndërsa zënka kishte vazhduar edhe pas përfundimit të ndeshjes.
Strategu italian është xhiruar duke i thënë lojtarit: “Mbylle gojën, budalla! Zhduku!”. Futbollisti ia ka kthyer duke i thënë trajnerit: “Shko në dreq!”, ndërsa është larguar drejt tunelit pa i përshëndetur tifozët vendas.
Allegri, i cili gjatë këtij sezoni ka pasur probleme të ngjashme edhe me Paulo Dybalan dhe Stephan Lichtsteinerin, është munduar që ta minimizojë incidentin gjatë konferencës për shtyp pas ndeshjes.
“Gjëra të këtilla ndodhin. Kisha tre lojtarë që duhej të zëvendësoheshin, sepse kishin ngërçe, ishte nje keqkuptim, por nuk qëndron këtu çështja, gjëra të këtilla ndodhin”.
“A është duke studiuar Bonucci për t’u bërë trajner? Mund të jetë diçka që mund të bëjë në të ardhmen, edhe pse ka edhe shumë për të mësuar”, ka thënë Allegri. /Telegrafi/
