Kurt Volker, ish-ambasador i SHBA-së në NATO, është pyetur nëse Vladimir Putin do të kishte “guxuar të ishte kaq i guximshëm, kaq brutal, kaq agresiv” në agresionin e tij në Ukrainë nëse Donald Trump do të ishte në Shtëpinë e Bardhë.
Dhe siç shkruan Sky News, përcjell Telegrafi, Volker thotë se është “e vështirë të dihet”, por kishte një element të presidentit Trump që ishte “shumë i paparashikueshëm dhe mendoj se Putini nuk ishte i sigurt se çfarë do të bënte Trump”.
“Unë gjithashtu mendoj se ai besonte se Trump ishte ‘komod’ kur përdorte forcën. Shikoni se si ne vepruam me kreun e Gardës Revolucionare iraniane”.
Volker thotë se para agresionit, qëllimet e Putinit ishin bërë “gjithnjë e më të qarta”.
Ai tha: “Nuk isha i sigurt nëse ai do të përpiqej të merrte të gjithë vendin dhe të rrëzonte qeverinë apo thjesht të merrte pjesë të Ukrainës lindore”.
“Mjerisht, tani është shumë e qartë se ai dëshiron të vrasë Zelenskyn, të largojë qeverinë dhe të kontrollojë të gjithë vendin”.
Volker shton se me veprimet e tij, Putin “i ka lënë vetes asnjë rrugëdalje”.
“Ai nisi operacionin e tij ushtarak me mendimin se mund të zgjaste dy ose tre ditë. Do të ishte mjaft e lehtë. Ata do të pushtonin Ukrainën. Natyrisht nuk është e vërtetë”.
“Forcat ruse janë bllokuar në shumë vende. Ata kanë pësuar shumë viktima, shumë humbje pajisjesh. Dhe tani këto sanksione kanë filluar të jenë vërtet të rëndësishme kundër ekonomisë ruse”. /Telegrafi/