Sulmuesi i Atletico Madridit, Luis Suarez u ka thënë tifozëve të Barcelonës që të mos fajësojnë trajnerin Ronald Koeman për largimin e tij të diskutueshëm, pasi faji u përket vetëm drejtuesve të klubit.
Pas fitores së Uruguait ndaj Kilit, Suarez foli për largimin e tij të shumë përfolur nga Barcelona, ndërsa nuk ngurroi të zbulojë prapaskenat.
“Koeman më tha se nuk do të largohesha nga klubi dhe se ai më kishte në planet e tij. Nuk ishte trajneri; ishin drejtuesit ata që më hoqën qafe te Barcelona”, ka thënë fillimisht Suarez për ESPN.
“I shqetësonte që isha shoku i Messit. Ata gjithmonë ankoheshin se Messi nuk shkonte mirë me asnjë sulmues në klub dhe kur ai shkon mirë me një, ata e heqin qafe atë”.
“Edhe dy vite më parë ata donin të më hiqnin qafe për të sjellë sulmues të tjerë. Ata nuk sollën askënd për të garuar me mua sepse unë po garoja në një nivel të lartë”.
“Unë fitova respekt dhe unë nuk e meritoja të zbulohet përmes mediave që po largohesha. Ata po flisnin për para dhe për mua që shkoja në një klub tjetër. Ata duhet të më kishin thirrur dhe shpjeguar si duhet pse po largohesha. Jam i vetëdijshëm për moshën dhe nuk kam pasur ndonjë problem të largohem”.
Nga ana tjetër, Suarez shpjegoi se Ronald Koeman donte ta mbante atë në Camp Nou.
“Nëse një trajner hyn dhe thotë se nuk je në planet e tij, atëherë fillon të dyshosh nëse është Koeman apo drejtorët që nuk të duan aty”.
“Koeman më thirri për të më njoftuar, por 10 ditë pasi e dinte që po largohesha. Ai tha që nëse nuk mund të gjeja një klub, ai do të më kishte në mendje”, përfundoi sulmuesi. /Telegrafi/