Shtetet e Bashkuara dhe aleatët e saj kritikuan ashpër Rusinë të premten në Kombet e Bashkuara për goditjen dhe marrjen nën kontroll të termocentralit më të madh bërthamor në Evropë – që gjendet në Ukrainë – dhe disa kërkuan që Moska të mos lejojë që një sulm i tillë të përsëritet.
Shumë nga 15 të dërguarit e Këshillit të Sigurimit shprehën “shqetësim të madh” dhe tronditje, duke paralajmëruar kundër mundësisë së përsëritjes së katastrofës së Çernobilit të vitit 1986 – një aksident bërthamor në Ukrainë, kur ishte pjesë e Bashkimit Sovjetik të atëhershëm, i konsideruar si më i keqi në histori.
Ata thanë se sulmi ishte kundër ligjit ndërkombëtar humanitar dhe i kërkuan Moskës të shmanget nga çdo operacion ushtarak që synon objektet bërthamore dhe të lejojë personelin ukrainas të lejohet në uzinë për të kryer punën e tyre.
“Bota shmangu ngushtë një katastrofë bërthamore mbrëmë”, tha Linda Thomas-Greenfield, ambasadorja e SHBA-së në Kombet e Bashkuara, në një takim urgjent të Këshillit të Sigurimit, të mbledhur pas kapjes së termocentralit bërthamor Zaporizhzhia në Ukrainën juglindore nga trupat ruse.
“Sulmi i Rusisë natën e kaluar e vuri në rrezik të madh termocentralin më të madh bërthamor të Evropës. Ishte tepër i pamatur dhe i rrezikshëm. Kjo kërcënoi sigurinë e civilëve në Rusi, Ukrainë dhe Evropë”, tha Thomas-Greenfield. /Telegrafi/