Kolonia e futbollistëve brazilian në Romë pritet të rritet ende pas afatit kalimtar të janarit.
Skuadra e madhe italiane e ka nisur në mënyrë perfekte këtë edicion në Serie A dhe në Ligën e Kampionëve duke kaluar grupin si e para.
Kësisoj presidenti James Pallota ka vendosur t’i bëjë një dhuratë trajnerit Eusebio Di Francesco.
Sulmuesi i talentuar brazilian, Anderson Talisca i cili është nën kontratë me Benficën por i huazuar tek Besiktas është objektivi i Romës.
Gazeta e njohur portugeze ‘Record’, ka shkruar se Roma dhe Benfica janë takuar për lojtarin.
Gjithnjë sipas kësaj gazete skuadra nga kryeqyteti italian i ka të gatshme 25 milionë euro për transferimin e Taliscas.
23-vjeçari është duke kaluar vitin e dytë si huazim tek Besiktas ku ka shkëlqyer si në kampionat ashtu edhe në Ligën e Kampionëve.
Në 20 ndeshjet në të gjitha garat, Talisca ka shënuar shtatë gola dhe ka dhuruar dy asistime për Besiktasin.
Kujtojmë që lojtari ka një kontratë me Benficën deri në qershor të vitit 2019. /Telegrafi/