Real Madridi është në kërkim të një sulmuesi që do të luante rolin e zëvendësuesit të Karim Benzemës.
Gjiganti madrilen pritet të nxjerr në shitje dy sulmuesit qendror, Luka Jovic dhe Mariano Diaz pasi trajneri Zinedine Zidane nuk është aspak i kënaqur me ta.
Kësisoj Los Blancos janë hedhur në sulm për ta gjetur një sulmues të ri që do të ishte zëvendësues i denjë për francezin Karim Benzema.
Mediat spanjolle kanë raportuar se Real Madridit i është propozuar transferimi i sulmuesit çek Patrik Schick.
24-vjeçari është i huazuar nga Roma te RB Leipzig ku ka shkëlqyer në futbollin gjerman, pasi ka realizuar 10 gola e ka bërë tre asistime në 24 takime të zhvilluara.
Klubi gjerman e ka mundësinë ta blejë lojtarin për 29 milionë euro, por për shkak të krizës financiare pas coronavirusit ende nuk e ka bërë një gjë të tillë.
Schick nuk do të mbetet te Roma dhe kjo gjë është e sigurt, ndërsa Giallorosët janë të gatshëm ta lejojnë largimin e tij edhe për një shumë prej 25 milionë eurove.
Trajneri Zinedine Zidane po e monitoron lojtarin dhe mund të ndodh që Reali ta transferojë atë në verë si rezervë e Benzemas. /Telegrafi/