I dërguari i Bashkimit Evropian për dialogun Kosovë-Serbi, Miroslav Lajçak sot do të qëndroj për vizitë zyrtare në Prishtinë.
Kjo vizitë e tij vjen në kohën kur në procesin e dialogut ka pasur zhvillime të reja, dhe ka për synim përgatitjen e raundit të ri të këtij procesi.
Lajçak gjatë qëndrimit të tij në Prishtinë pritet të takohet me krerët e institucioneve shtetërore.
Fillimisht emisari i BE-së do të pritet në takim nga presidentja Vjosa Osmani. Sipas njoftimit për media thuhet se takimi mes Osmanit e Lajçakut do të nis në orën 14:10.
Pas takimit me Osmanin, Lajçak do të zhvilloj një takim edhe me kryeministrin Albin Kurti.
Takimi do të nis në orën 16:00 në ndërtesën e Qeverisë. Kështu ka njoftuar Zyra e Kryeministrit përmes një njoftimi për media.
Vizita e Lajçakut në Prishtinë dhe Beograd vjen pas takimit të 27 shkurtit, kur kryeministri i Kosovës, Albin Kurti, dhe presidenti i Serbisë, Aleksandar Vuçiq, e pranuan planin evropian për normalizimin e raporteve. Bartësit e dialogut po ashtu u shprehën të gatshëm të punojnë në planin për zbatimin e këtij propozimi.
Rundi i ri i dialogut është caktuar të mbahet më 18 mars në Ohër të Maqedonisë së Veriut, dhe sipas BE-së, qëllimi kryesor tani është që palët të arrijnë pajtim rreth një plani si dhe të modaliteteve për zbatimin e propozimit evropian. /Telegrafi/