Profesoresha e Universitetit të Prishtinës “Hasan Prishtina”, Lindita Tahiri, e ftuar në serinë e dytë të “Përballje Podcast”, tha se edukimi medial nuk ka të bëjë vetëm me mediumet.
Sipas saj, edukimi medial kapërcen kufijtë e medias dhe më shumë është mendim kritik.
“Është më shumë një mendim kritik, një skepticizëm, një dyshim në atë që e procesojmë ne si kuptim. Si ndodh kjo, pse unë kuptoj kështu, kush ma thotë mua këtë, a kam unë ndonjë paragjykim ose ndonjë ide time që e deformon kuptimin. Pra është shumë më e vështirë. Është shumë dimensionale”, deklaroi Tahiri.
Profesoresha e UP-së tutje u shpreh se publiku është i rrethuar dhe i vërshuar nga shumë mesazhe. Po ashtu, ajo tha se sfidat e arsimit krijojnë nevojën për shkathtësi që ndër të tjera ka të bëjë me mënyrën si e shfrytëzojmë ne gjuhën për të komunikuar.
“Çështja e dezinformimit u bë e zhurmshme këtë dekadë. Ka ekzistu gjithmonë dezinformimi, po kjo u bë e zhurmshme tash. Pse? Sepse kapaciteti potencial interpretues ka filluar të dobësohet te publiku. Publiku është i rrethuar, është i vërshuar nga shumë mesazhe, shkollimi është shumë masiv nga njerëzit përfaqësor, rinia shkollohet më shumë informalisht sesa formalisht dhe këto sfida të arsimit gjithsesi e përfshijnë atë nevojë për një shkathtësi, të mos themi vetëm edukimi medial, që mos mendojë publiku që ka të bëjë veç me mediumet. Ka të bëjë me kulturën, ka të bëjë me jetën e përditshme, ka të bëjë me mënyrën si e shfrytëzojmë ne gjuhën për të komunikuar. Dhe kjo është një shkathtësi që i kapërcen kufijtë e medias”.
“Përballje Podcast” realizohet me mbështetjen e Institutit Kombëtar Demokratik (NDI) dhe Agjencisë së Shteteve të Bashkuara për Zhvillim Ndërkombëtar (USAID), në Kosovë. Opinionet e shfaqura në këtë Podcast nuk pasqyrojnë domosdoshmërisht pikëpamjet dhe qëndrimet e NDI dhe USAID. /Telegrafi/
