Drejtori i Juventusit, Fabio Paratici, ka konfirmuar se ata nuk do ta prezantojnë trajnerin e ri derisa të përfundojë ky sezon, por ka thënë se nuk e kanë kontaktuar Pep Guardiolan.
Zonja e Vjetër është duke u përballur me Sampdorian në xhiron e fundit në Serie A për sezonin 2018/19, andaj janë duke e pritur përfundimin e këtij edicioni para se ta prezantojnë trajnerin e ri.
Massimiliano Allegri ka konfirmuar para disa ditësh se do të largohet nga Juventusi pas pesë vitesh, andaj Paratici ka bërë të ditur se në qershor do ta prezantojnë trajnerin e ri.
“Ne nuk jemi këtu për të shkruar ballinat e gazetave apo për të shpikur ndonjë gjë, ne jemi këtu vetëm për të ndërtuar një skuadër. Ne do të punojmë në bazë të rregullores tonë dhe do ta emërojmë në muajin tjetër trajnerin tonë të ardhshëm”, ka thënë drejtori i Juventusit për DAZN.
“Kontaktet me Pep Guardiola? Kjo botë është e çuditshme. Ne nuk e kemi kontaktuar kurrë Guardiolan dhe nuk kemi menduar për të. Ai është nën kontratë, kështu që duket shumë e çuditshme. Ne dimë se bota jonë duket kështu dhe duhet ta pranojmë atë”, ka shtuar më tej Paratici. /Telegrafi/