Eddie Hearn ka bërë të ditur se në 48 orët e ardhshme, Andy Ruiz Jr do të njoftohet për vendin se ku do të zhvillohet rimeçi ndaj Anthony Joshuas.
Tifozët e boksit janë duke pritur qe një kohë që të mësojnë se ku do të zhvillohet dueli i dytë ndërmjet dy boksierëve, në Britani të Madhe apo në Amerikë.
Joshua i humbi titujt e tij në përballjen e parë të zhvilluar në Madison Square Garden të New Yorkut (që ishte edhe debutimi i AJ në Amerikë) dhe dëshiron që rimeçi të zhvillohet në vendin e tij.
Ruiz ka insistuar që sërish të përballet në SHBA, mirëpo Hearn e ka bërë të qartë se vendimi për vendin e duelit i takon britanikut.
“Ata nuk duan të vijnë në Mbretërinë e Bashkuar… Me kontratë e dimë pozitën tonë… Duam të sigurohemi për zhvillimin e përballjes dhe duam ta respektojmë Andy Ruizin”.
“Ne do të vendosim se ku do të jetë vendi. Një vend neutral, ai do të ishte shumë më i kënaqur, por nuk mund ta hedh poshtë edhe Amerikën tash për tash”.
“Cardiffi mbetet favorit dhe kryeson në listë, por janë edhe disa opsione tjera interesante… Nuk e kemi përjashtuar asnjë vend ende, por në 48 orët e ardhshme ekipi i Andy Ruiz do ta dijë se ku do të zhvillohet meçi, “, është shprehur Hearn për Sky Sports. /Telegrafi/