Ministri i Bujqësisë, Pylltarisë dhe Zhvillimit Rural, Besian Mustafa ka dërguar ekipe në terren pas erërave të forta që kanë goditur rajonin e Pejës.
Këtë e bëri të ditur Mustafa duke thënë se këto ekipe janë dërguar me qëllim që të evidentojnë dëmet e shkaktuara në rajonin e bujqësisë.
Mustafa thotë se ekipi do të monitorojë dhe vlerësoj këto dëme, e që po ashtu do të analizojnë mundësitë buxhetore, ligjore dhe operative për të përkrahur fermerët e dëmtuar atje.
“Sot kam dërguar në terren ekipin e Ministrisë, i cili në bashkëpunim me përfaqësuesit e Komunës së Pejës dhe Istogut, do të evidentojë dëmet e shkaktuara në sektorin e bujqësisë nga erërat e forta, që kanë mbretëruar mbrëmjen e kaluar në këtë rajon. Ky ekip do të monitorojë dhe vlerësojë këto dëme dhe si Ministri do të analizojmë mundësitë buxhetore, ligjore dhe operative për të përkrahur fermerët tanë drejt rimëkëmbjes sa më shpejt”, shkruan Mustafa. /Telegrafi/
