Legjenda e Borussia Dortmundit, Mats Hummels, pritet që të largohet nga klubi këtë verë dhe dy klube të mëdha në Serie A janë shumë të interesuara për shërbimet e gjermanit.
Hummels ka qenë njëri ndër qendërmbrojtësit më konsistent gjatë dekadës së fundit dhe ka shkëlqyer me paraqitjet e tij tek Dortmundi dhe Bayern Munich përgjatë viteve.
Kontrata e gjermanit me Dortmundit pritet të skadojë në fund të sezonit dhe ende nuk është konfirmuar se çfarë premton e ardhmja e tij.
Sipas gazetës gjermane Bild, e ardhmja e Hummeslit nuk është vendosur ende pasi ekziston mundësia që ai të pensionohet, të rinovojë me Dortmundin apo të largohet në drejtim të një ekipi tjetër.
Pavarësisht kësaj, raporti sugjeron se Milani dhe Juventusi kanë shprehur interesim të madh për qendërmbrojtësin, pasi po shikojnë që të përforcojnë ekipin e tyre për sezonin e ardhshëm, në kërkim të titullit në Itali.
Kur Hummels dhe Dortmundi do të përballen me Real Madridin në finale të Ligës së Kampionëve më 1 qershor, do të jetë mundësia e dytë e gjermanit për t’u bërë kampion evropian dhe me gjasë mundësia e fundit për ta bërë këtë me Dortmundin.
Fituesi i Kupës së Botës duhet të presë deri pas përfundimit të finales së Ligës së Kampionëve ndaj Real Madridit për të marrë vendimin përfundimtar dhe rezultati mund të luajë një rol të madh në atë se çfarë premton e ardhmja për të./Telegrafi/