Analisti Shkelzen Maliqi ka thënë se Albin Kurti në qeverisjen me LDK-në do të duhej të dëgjonte mendimet dhe qëndrimet e partnerit, përndryshe koalicioni nuk do të funksionojë gjatë.
Kjo sipas tij, është sfida më e madhe e fituesve të zgjedhjeve të 6 tetorit.
“Fituese e zgjedhjeve, nëse rinumërimet nuk bëjnë çudi, padyshim është Lëvizja Vetëvendosje. Por, nuk është larg fitores as LDK-ja ngase pa të LVV nuk mund ta krijojë qeverinë. Në të vërtetë, jo vetëm teorikisht, LVV e ka mundësinë që të negociojë partneritetin për qeverisje edhe me PDK-në, por këtë nuk do ta bëjë pa u vetë-kompromentuar”, thotë Maliqi, njofton Telegrafi.
Ai ka folur edhe për postin e kryeministrit, dhe ndarjen e posteve ministrore, për të cilin ka thënë se nëse LDK kërkon shumë, LVV mund ta shantazhojë LDK-në me përsëritjen e zgjedhjeve.
“Duke hapur bisedat për koalicion me LDK-në, LV ia pranon kësaj partie fitoren e king-maker, deri edhe të “shantazhimit” të postit të kryeministrit, ose të ndarjes joproporcionale të posteve ministrore. Për të zvogëluar fuqinë negociuse / shantazhuese të LDK-së si king-makere, LV mund ta shantazhojë LDK-në me përsëritjen e zgjedhjeve, duke e kërcënuar me një fitore edhe më dërmuese dhe decisive. Megjithatë, shton se arsyeja thotë se dy fituesit nuk do t’i futen këtyre skenarëve të shantazhimeve të ndërsjella duke e kërkuar një format të kënaqshëm të bashkëqeverisjes dhe të ndarjes proporcionale të pushtetit”, ka shkruar ai.