Joan Laporta është pyetur nëse Erling Haaland mund të rikthehet në radarin e Barcelonës në të ardhmen.
Katalunasit ishin përmendur ndër destinacionet potenciale të sulmuesit norvegjez, gjatë kohës sa ishte te Borussia Dortmundi.
Mirëpo, derisa pritej që 22-vjeçari të nënshkruante kontratë të re me klubin gjerman, ndërhyri Manchester City për ta siguruar transferimin e tij dhe tashmë ai i ka realizuar 27 gola në 21 paraqitje me kampionin anglez.
Nëse Haaland do të ishte sërish në dispozicion, atëherë padyshim se shumë klube do t’i dëshironin shërbimet e tij, prandaj gazetarët e Cadena Ser e kanë pyetur Laportan për veprimin eventual të Barcës në atë rast.
“Sa i përket Haalandit, të shohim se çfarë do të bëjë te City. Ne aktualisht e kemi (Robert) Lewandowskin”, është shprehur kreu i Blaugranëve.
Njëherësh, ai ka sqaruar se spekulimet për një transferim të shtrenjtë të fubtollistit tjetër të Cityt, Bernardo Silva, nuk janë të vërteta.
“Ne nuk do të paguajmë 80 milionë euro për Bernardo Silvan. Kjo është e sigurt”, ka shtuar Laporta. /Telegrafi/