Fitorja e Manchester Unitedit ndaj Ajaxit në finale të Ligës së Evropës është plotësuar edhe me një çmim shtesë – kualifikimin e drejtpërdrejtë në fazën grupore të Ligës së Kampionëve.
Zakonisht është i garantuar vetëm një vend në kualifikime, mirëpo duke qenë se të dy finalistët e Ligës së Kampionëve (Juventusi dhe Real Madridi) e kanë siguruar kualifikimin, atëherë vendi është dhënë për fituesin e Europa League.
Dhe falë koeficientit të mirë të renditjes, Djajtë e Kuq do të përfshihen në vazon 2 të shortit. Klubet e garantuara që do t’i bashkohen Unitedit në vazon 2 janë Barcelona, Atletico Madridi, Paris Saint-Germaini, Borussia Dortmundi, Manchester City dhe Porto – që do të thotë se i kanë shmangur disa kundërshtarë të vështirë.
Por, ata mund të luajnë kundër pjesëtarëve të vazos 1 (përveç Chelseat). Tri nga këto skuadra janë Shakhtar Donetsk, Monaco dhe Spartak Moska, njofton Telegrafi.
Zakonisht, vetëm shtatë kampionë, plus fituesi i Ligës së Kampionëve do të jenë në vazon 1 – ndërsa meqë edhe Juve edhe Reali janë kampionë në ligat përkatëse, atëherë do të përfshihet edhe një kampion nga një vend i tetë (në këtë rast i Ukrainës që është Shakhtari).
Kualifikimi i Unitedit nënkupton se Napoli do të zhvendoset në vazon 3 nëse klubi italian dhe Sevilla sigurojnë fazën grupore. Njëherësh edhe Anderlechti dhe Ajaxi mund të jenë kundërshtarë të Djajve të Kuq.
Sido që të jetë, më poshtë jua sjellim skenarin më të mirë dhe më të keq për grupin ku mund të përfshihet edhe Manchester Unitedi:
Skenari më i mirë:
Vazo 1: Spartak Moska (Rusi)
Vazo 2: Manchester United (Angli)
Vazo 3: Basel (Zvicër)
Vazo 4: Copenhagen (Danimarkë)
Skenari më i keq:
Vazo 1: Real Madrid (Spanjë)
Vazo 2: Manchester United (Angli)
Vazo 3: Napoli (Itali)
Vazo 4: RB Leipzig (Gjermani)
/Telegrafi/