Jurgen Klopp dhe Liverpooli kanë zbarkuar në Londër, ku do t’i zhvillojnë dy ndeshje brenda pak ditësh ndaj Chelseat.
Përballja e parë zhvillohet të mërkurën në Kupën e Ligës, ndërsa në fundjavë për Ligën Premier.
Klopp e sheh Chelsean si favorit për titull, por ka edhe fjalë të mira për trajnerin Maurizio Sarrin.
“Flitet gjithmonë që favoritë për titull janë Liverpooli dhe Manchester City, por të gjithë harrojnë të përmendin Chelsean”.
“Është një skuadër që luan një futboll mjaft të bukur dhe për më tepër, ka në përbërje lojtarë, shumica e të cilëve e kanë fituar titullin kampion më shumë se një herë në karrierën e tyre”.
“E admiroj futbollin që bën Sarri, pasi e kam ndjekur edhe te Napoli, ku aplikonte një lojë spektakolare”.
“Gjithsesi ajo që më ka bërë më shumë përshtypje është fakti që ka arritur të përçojë në mënyrë shumë të shpejtë idetë e tij te lojtarët e Chelseat, të cilët tashmë po luajnë po kaq bukur”, ka thënë trajneri i “The Reds”. /Telegrafi/