Policia e Shtetit ka njoftuar përmbylljen e një operacioni për goditjen e një grupi që ushtronte aktivitetin e paligjshëm të kalimit të shtetasve nga vendet e treta, drejt vendeve të Bashkimit Evropian, përmes Shqipërisë.
Sipas njoftimit, policia ka arrestuar 4 shtetas, njëri prej tyre sirian, ka shpallur në kërkim 2 bashkëpunëtorët e tyre, dhe ka proceduar penalisht në gjendje të lirë 1 shtetas tjetër.
Shtetasi me origjinë nga Siria, A. M., 23 vjeç, kishte rolin e organizatorit në këtë veprimtari kriminale, ndërsa D. D., 39 vjeç, banues në Tiranë, kishte rolin e ndihmësit të grupit për transfertat e pagesave. Policia ka arrestuar edhe shtetaset A. A., 20 vjeçe dhe J. K., 26 vjeçe, të dyja banuese në Tiranë.
“Janë shpallur në kërkim shtetasit: M. A., me origjinë nga Siria, i cili siguronte mjetet e transportit për kalimin e kufirit dhe A. M., me origjinë nga Siria, i cili ndihmonte dhe shoqëronte emigrantët, kryesisht ata nga Siria, për kalimin e kufirit me Kosovën, me qëllim kalimin në vendet e BE-së”, ka shtuar policia.
“Gjatë operacionit, këta shtetas janë kapur në flagrancë në një hotel, gati për të transportuar 5 shtetas sirianë. Në vijim të veprimeve është proceduar penalisht në gjendje të lirë për veprën penale “Veprime që pengojnë zbulimin e të vërtetës”, shtetasi P. P., 68 vjeç”, ka theksuar policia.
“Nga hetimet e kryera dhe provat e grumbulluara ka rezultuar se këta shtetas, në bashkëpunim me njëri-tjetrin, organizonin kalimin e shtetasve me origjinë siriane, nga Turqia nëpërmjet Greqisë, futjen në territorin shqiptar, strehimin e tyre në hotele të ndryshme në Tiranë, gjetjen e personave për të kryer transportimin e tyre, duke ndjekur rrugën e Arbrit në drejtim të qytetit të Peshkopisë, me qëllim kalimin e tyre për në Kosovë, Serbi dhe Hungari”, ka shpjeguar policia.
Sipas policisë, shuma e parave që çdo emigrant i paligjshëm paguante fillonte nga 4,000 euro deri në 6,000 euro, të cilat i kryenin nëpërmjet kompanive për shërbimet e transfertave të parave.
Në vijim të hetimeve është dokumentuar se këta shtetas janë autorët e dy rasteve të tjera të tentativës për të transportuar emigrantë të paligjshëm, gjatë muajve janar dhe shkurt. Në momentin që janë konstatuar nga shërbimet e Policisë Dibër, këta shtetas, duke përfituar nga errësira dhe terreni i vështirë kanë braktisur mjetet dhe janë larguar.
Po si rezultat i këtij procedimi, në muajin dhjetor 2021 janë arrestuar në flagrancë nga Policia shtetasit S. K. dhe N. K., të cilët janë kapur duke transportuar shtetas sirian.
Gjatë gjithë periudhës së zhvillimit të këtij operacioni janë kapur dhe shoqëruar gjithsej 35 shtetas sirian. Janë sekuestruar në cilësinë e provës materiale 3 automjete, një laptop, 12 telefona celularë, 1,000 euro dhe 5 pasaporta.
Vijojnë hetimet për identifikimin e personave të tjerë të implikuar në këtë aktivitet kriminal dhe kapjen e atyre të shpallur në kërkim. /Telegrafi/
