Biljana Jovanovska, drejtoreshë e Agjenicisë për Punësime ka reaguar ndaj pohimeve të Hristijan Mickoskit, lider i OBRM-PDUKM-së, në debatin televiziv të mbajtur mbrëmë, ku u përballën Kryeministri Zoran Zaev dhe Hristijan Mickoski.
Jovanovska ashpër i demanton, duke i konsideruar si të pa vërteta dhe tendencioze pohimet e Mickoskit për gjoja punësim të familjarëve të saj në Agjencinë e Punësimit, përcjell Telegrafi Maqedoni.
Ajo thekson se në 10 muajt e fundit në Agjencinë në fjalë punësohen kuadro të nevojshëm profesionalë të cilët kanë aplikuar përmes konkurseve publike, dhe se asnjëri prej tyre nuk është në lidhje farefisnore me të.
Jovanovska i lidh akuzat e Mickoskit me pararendësen e saj, Sllobodanka Aleksovska, që sipas Jovanovskës, është konstatuar se e ka keqpërdorur pozitën e saj dhe ka blerë gjëra ushqimore dhe veshje me para të shtetit.
Jovanovska thotë se këshilltarja e Mickoskit duhet të jep llogari për dëmet e shkaktuara në Agjencinë e punësimit./Telegrafi/
