Avokati i Popullit, Hilmi Jashari, ka thënë se zvarritja e lëndëve gjyqësore do të mund t’i kushtonte shumë buxhetit të Kosovës nëse qytetarët do të ankoheshin në Gjykatën e Strasburgut.
Jashari, në emisionin “Përballje” me gazetarin Muhamet Hajrullahu në RTV Dukagjini, ka thënë se në Kosovë ekzistojnë mbi 100 mijë lëndë gjyqësore të pazbatuara.
Ai ka thënë se me këto lëndë dëmi minimal, që mund t’i bëhet buxhetit të shtetit shkon në mbi 8 milionë euro.
Avokati i Popullit ka thënë se anëtarësimi i mundshëm i Kosovës në Këshillin e Evropës do t’u hapte të drejtën qytetarëve të Kosovës për ankesa në Gjykatën e Strasburgut, përcjell Telegrafi.
Ai ka thënë se duke marrë parasysh numrin shumë të madh të lëndëve të pazgjidhura kjo mund ta dëmtonte rëndë buxhetin e Kosovës, nëse qytetarët e saj do të ankoheshin për vonesat e lëndëve.
“Në shumë prej këtyre lëndëve në Kosovë vërehet një shkelje, duke filluar nga zvarritjet procedurale që është në kundërshtim me praktikën gjyqësore të Gjykatës së Strasburgut… Nëse gjykata konstaton shkelje, veprimi i parë pasues vjen kompensimi, sepse ke shkelur të drejtën e tij. Nga këto lëndë vetëm shpenzimet procedurale, po të paguheshin, shteti do të duhej të paguante 400 mijë euro”.
Jashari ka thënë se shtete, si Italia, janë detyruar të bëjnë reforma gjyqësore, pasi ishte rrezikuar buxheti i shtetit nga kompensimi i rasteve për shkelje të drejtave të njeriut.
“Në Kosovë qytetari nuk kompensohet kurrë pothuajse në rastet kur e drejta e tyre shkelet nga shteti. Kompensimi do të duhej të ndodhte automatikisht në momentin e konstatimit të shkeljes së të drejtave”.
Jashari ka thënë se përpos kompensimit, do të ishte e ndershme edhe një kërkim falje për personin që i është shkelur e drejta./Telegrafi/