Agjentët e Lautaro Martinezit janë parë në zyrat e Interit pasditen e të hënës, ku do të diskutojnë lidhur me kontratën e re të argjentinasit.
Barcelona dhe Real Madridi janë klubet e interesuara për shërbimet e sulmuesit, ndërsa përfaqësuesit e tij, Beto Yaque dhe Rolando Zarate, janë takuar me drejtuesit e klubit.
Kontrata e Lautaros skadon në qershor të vitit 2023 dhe përfshin një klauzolë prej 111 milionë eurosh, e cila mund të aktivizohet vetëm brenda muajit korrik.
Sipas burimeve të ndryshme në mediat italiane, Interi do t’i ofrojë lojtarit rinovimin e kontratës me përfitime prej pesë milionë eurosh në sezon.
Megjithatë, kjo shumë është shumë më e vogël në krahasim me propozimin e Barcës prej 10 milionë eurosh në vit, porse katalunasit nuk ishin të gatshëm ta paguajnë çmimin e klauzolës.
Nga ana tjetër, Sport Mediaset ka raportuar gjatë të hënës se Reali ka përgatitur një ofertë prej 100 milionë eurosh për Lautaron. Por, Sky Sport Italia dhe Sportitalia e kanë përgënjeshtruar këtë lajm, duke theksuar se nuk ka pasur ofertë nga Los Blancos.
Dy përfaqësuesit e futbollistit në javën e kaluar kanë qëndruar në Barcelonë dhe pritet ta njoftojnë Interin lidhur me ofertën e re të Blaugranëve. /Telegrafi/