Ministrja e Drejtësisë, Albulena Haxhiu e ka quajtur të drejtë dënimin për vrasësin e Marigona Osmanit, Dardan Krivaça dhe bashkëpunëtorit të tij në krim, Arbër Sejdiu.
Haxhiu ka pohuar se ndërgjegjja kolektive mbase mund të jetë më e qetë kur drejtësia në emër të popullit, vihet siç duhet.
“Gjykata Themelore në Ferizaj shqiptoi dënimin maksimal ndaj një prej krimeve më mizore të shkaktuara viteve të fundit, dhunës deri në vdekje ndaj Marigona Osmanit nga krimineli Dardan Krivaça dhe bashkëpunëtori në krim, Arbër Sejdiu. Ndërgjegjja kolektive mbase mund të jetë më e qetë kur drejtësia në emër të popullit, vihet siç duhet”, ka shkruar Haxhiu në Facebook.
Ministrja ka shtuar tutje se “Uroj që drejtësia ndaj rasteve të dhunës e vrasjeve të grave të jetë në nivelin më të lartë profesional, duke shqiptuar dënimet më meritore, të pa ndikuara dhe të pa ngarkuara nga mendime provinciale e patriarkale siç kemi parë në të kaluarën”.
Në Gjykatën Themelore sot në Ferizaj u dënua me burgim të përjetshëm Dardan Krivaça, ndërsa Arbër Sejdiu u dënua me 15 vjet për ndihmë në vrasjen e Marigona Osmanit. /Telegrafi/
