Erling Haaland zbuloi detaje interesante lidhur me kalimin e tij në Manchester City dhe sesi ky klub kishte planifikuar ta sillte në radhët e veta edhe një vit e gjysmë më parë, ndërsa u ndal edhe tek skuadrat e tjera që ishin në garë për nënshkrimin e tij.
Haaland ka thënë se kampioni aktual i Anglisë në futboll e ka pritur për nënshkrimin e tij për një vit e gjysmë dhe shpresonte në një rast për ta sjellë në radhët e tyre dhe gjithçka filloi gjatë ndeshjeve me Borussia Dortmund në çerekfinale të Ligës së Kampionëve.
“Pas asaj ndeshjeje, mendoj se 15 persona erdhën tek unë dhe më thanë se duhet të shkoja tek ta. Stones, Ruben Dias, Gundogan, Foden, De Bruyne…”.
“Nuk mora kurrë një vendim për klubin e ardhshëm për shkak të trajnerit që drejton, por sigurisht që ishte një plus i madh që Pep Guardiola ishte në Man City. Ai është trajneri më i mirë në botë dhe Man City është projekti më i mirë sportiv për momentin dhe vendi ku unë do të mund të jem më i miri”, ka treguar Haaland.
Pas kësaj ai ka treguar edhe se cilat klube të tjera kanë qenë në qarkullim për nënshkrimin e tij.
“Mendoj se Manchester City ishte skuadra më e mirë në listën tonë. Bayern Munich ishte në vendin e dytë, dhe Real Madrid ishte në vendin e tretë. PSG-ja është e radhës, dhe sigurisht, ka edhe disa skuadra të tjera angleze në listë, si Liverpool dhe Chelsea. Ishte edhe Barcelona, të gjithë janë afërsisht në të njëjtin rend”, ka treguar Haaland.
Në fund mund të thuhet se norvegjezi mori vendimin e duhur, pasi deri më tani ka arritur të shënojë 14 gola në 10 ndeshjet e para në të gjitha garat./Telegrafi/