Eksperti i sigurisë kibernetike, Bajram Zeqiri ka ndarë informacionet e fundit rreth rreziqeve potenciale online.
Themeluesi i komunitetit XOR, ka publikuar një listë me domenët që duken të dyshimtë dhe që potencialisht mund të përdorën për të shpërndarë Fake News dhe bërë propagandë.
“Janë mbi 75 domenë të regjistruar vetëm për muajt janar-shkurt 2022, të cilat të gjitha kanë karakter që potencialisht mund të përdorën për ndonjë portal që lëshon Fake News apo shtrembërim të opinionit, ka shkruar ai.
Gjatë të shtunës, domeni “lajme.store” kishte publikuar një lajm të rremë i cili thoshte se është vrarë presidenti i Ukrainës, Volodymyr Zelensky duke përdorur kredencialet e Telegrafit.
Mirëpo, Telegrafi me anë të një sqarimi publik ka treguar se ky lajm ishte i fabrikuar dhe se nuk merr përgjegjësinë për këtë.
“Telegrafi informon opinionin se ky lajm nuk është i publikuar nga mediumi ynë dhe se i njëjti është i montuar nga persona të papërgjegjshëm. Telegrafi fton organet e policisë dhe hetuesisë që të ndërmarrin urgjentisht hapa ndaj personave që kanë shpërndarë panik në publik me publikimin e një lajmi të rrejshëm me emër dhe logo të Telegrafit”, thuhej në reagim.
Ditë më parë, XOR pati njoftuar gjatë muajit shkurt kanë vërejtur një kampanjë mjaft specifike duke imituar portalin “e-Kosova” të Republikës së Kosovës. /Telegrafi/