Telegrafi

E gjithë bota po komenton deklaratën e Macronit, tani polakët thonë të njëjtën gjë: Nuk përjashtohet mundësia e dërgimit të trupave në Ukrainë

Ministri i Jashtëm polak, Radoslaw Sikorski iu përgjigj pozitivisht fjalëve të fundit të presidentit francez, Emmanuel Macron, për mundësinë e vendosjes së forcave perëndimore në Ukrainë.

“Prania e forcave të NATO-s në Ukrainë nuk është e paimagjinueshme”, shkroi Sikorski mbrëmë në platformën X.

Lexo po ashtu Macron paralajmëron aleatët të mos jenë "frikacakë"

“Unë e vlerësoj iniciativën e presidentit francez Emmanuel Macron sepse ka të bëjë me frikën e Putinit, jo se ne kemi frikë nga Putini”, vazhdoi ai.

Polonia ka qenë një aleat i vendosur i Ukrainës që kur Moska filloi pushtimin e shtetit ukrainas në shkurt të vitit 2022.

Qëndrimi i Sikorskit është në kontrast me atë të kryeministrit polak, Donald Tusk, i cili deklaroi javën e kaluar se Polonia nuk e ka ndërmend të dërgojë forca në Ukrainë.

Kujtojmë se Macron shkaktoi një sërë reagimesh kur tha se dërgimi i forcave perëndimore në Ukrainë nuk ishte jashtë diskutimit.

Lexo po ashtu Ushtria franceze "po përgatitet për luftë" - stërvitet në një kamp më të madh se Parisi

“Sot nuk ka konsensus për vendosjen zyrtare të forcave tokësore”, tha udhëheqësi francez dhe shtoi se “Por, asgjë nuk mund të përjashtohet në dinamikë. Ne do të bëjmë gjithçka që është e nevojshme për të siguruar që Rusia të mos mund ta fitojë këtë luftë”.

Ndryshe, ushtria franceze si kurrë më parë ka nisur të stërvitet në një kamp, i cili është më i madh se Parisi. /Telegrafi/