Albian Ajeti është larguar nga Baseli në vitin 2019, por pas dy viteve e gjysmë në Britani mund të rikthehet në Zvicër.
Sulmuesi llapjan fillimisht u transferua te West Ham United, por pas një viti qëndrim në Londër është bashkuar me gjigantin skocez, Celtic.
Aventura në Skoci nuk ka qenë më e mira e mundshme, pasi sulmuesi qendror vetëm në fillim ishte mirë pastaj humbi vendin e titullarit.
Në edicionin e parë Ajeti kishte shënuar gjashtë gola e kishte bërë katër asistime, derisa tani pas gjashtë muajve ka shënuar tre gola dhe ka asistuar në një tjetër në 17 ndeshje.
Baseli ka shprehur interesim për ta rikthyer në shtëpi shqiptarin me pasaportë zvicerane, për ta zëvendësuar sulmuesin brazilian Artur Cabral.
Në fakt Cabral ishte transferuar në vitin 2019 te Baseli për ta zëvendësuar Ajetin dhe tani sulmuesi shqiptar do të jetë zëvendësues i brazilianit që po kalon te Fiorentina.
Celtic është gati ta lejoj largimin e Ajetit, por po kërkon nga Baseli shumën prej katër milionë eurove.
Blick ka shkruar se dy klubet janë në bisedime dhe Ajeti mund të rikthehet në Zvicër gjatë ditëve të ardhshme, kur kanë mbetur edhe tri ditë deri në mbylljen e afatit kalimtar të janarit. /Telegrafi/