Barcelona ka vendosur të përballet me skuadrat e mëdha të Ligës Premier për sulmuesin turk të Romës, Cengiz Under.
Talenti turk ka befasuar të gjithë me cilësitë e tij këtë sezon me Romën, duke shënuar shumë gola dhe dhuruar asistime.
Ndeshjet e tij të mira kanë bërë që shumë skuadra të mëdha të vihen pas tij, ndërsa drejtori sportiv i Romës, Monchi, ka konfirmuar interesimin e Barcelonës këtë javë.
“Bayram Tutumlu (agjenti i Under), i cili ka një marrëdhënie të mirë me Barcelonën, më tha se ata kanë pyetur për djaloshin”, ka thënë fillimisht Monchi.
“Ne nuk kemi oferta për djaloshin e madh, por me siguri shumë skuadra e ndjekin atë, për shkak të moshës së tij dhe golave të tij”, përfundoi drejtori sportiv.
Sipas mediumit italian Corriere della Sera, Barça është bashkuar në garën me Arsenalin dhe Manchester City për Under.
Ndryshe, Under është i lidhur me Romën deri në vitin 2020, por Roma mund të tundet nga ndonjë ofertë e lartë.
Ky medium raporton se Roma do të tundej me një ofertë prej 30 milionë eurosh dhe kjo do të ishte e mjaftueshme që Giallorossët ta shesin këtë verë. /Telegrafi/