Babai i një ushtari të vdekur të Forcave të Mbrojtjes të Izraelit (IDF) ka thënë se “terroristët e Hamasit” ishin përpjekur të shisnin kokën e djalit të tij për 10,000 dollarë.
“Kjo është thjesht një barbarizëm i çmendur”, citohet të ketë thënë David Tahar në një intervistë për Channel 14, shkruajnë mediat e huaja, përcjell Telegrafi.
Siç thuhet më tej, ai ishte përpjekur për muaj të tërë të gjente kokën e djalit të tij pasi IDF-ja e gjeti trupin e tij pas sulmit të 7 tetorit.
“Nga një skanim CT që kam marrë së fundmi, i gjithë trupi i tij është plot me plagë dhe fatkeqësisht edhe trupi i Adir është abuzuar pasi u vra”, pretendon babai i tij.
David Tahar tha për Fox News Digital se militantët vranë djalin e tij, Cpl. Adir Tahar, 19 vjeç, me një predhë antitank pasi ndihmoi të shpëtonte disa nga shokët e tij.
Sulmi shkatërroi njësinë e Brigadës Golani në të cilën shërbente djali i tij, dhe militantët më pas – siç thuhet më tej – ia prenë kokën Adir Taharit.
Veç kësaj, David Tahar pohoi se provat treguan se militantët qëlluan mbi trupin e Adir Taharit me armët e tyre pasi ai vdiq.
Ndryshe, IDF arriti të identifikojë trupin e Adir Taharit vetëm falë etiketave të tij të identitetit, testit të ADN-së dhe sendeve personale në xhepat e tij, raportoi The Times of Israel.
Babai i Davidit theksoi se “të martën mbrëma, pashë Adirin para se ta varrosja, mora arkivolin e tij dhe e hapa dhe aty pashë që i mungonte koka”.
Ai e përshkroi momentin e tmerrshëm si “një nga momentet më të vështira që një njeri mund të përjetojë është të shohë djalin e tij të shtrirë, të vdekur, veçanërisht kur ai është i shtrirë pa kokë. Është një nga ndjenjat më të tmerrshme në botë”.
Raportet thonë se fati i kokës së Adir Taharit u zgjidh përfundimisht pasi forcat izraelite mësuan nga dy militantë të kapur të Hamasit se ishin përpjekur të shisnin kokën e një ushtari IDF dhe dhanë detaje se ku mund ta gjenin forcat.
Një njësi elitare e dislokuar në Gazën qendrore gjeti kokën në një qese brenda një frigorifer në Sheshin e Palestinës, sipas gazetës izraelite i24.
ADN-ja dhe të dhënat dentare e identifikuan atë si kokën e Adir Taharit dhe u kthye në Izrael. /Telegrafi/