Këngëtarja shqiptare, Ava Max, i është bashkuar artisteve të tjera shqiptare të cilët në fokus kanë vënë përkrahjen e shtetit të Kosovës.
Kjo ka ndodhur pasi në hartën e kompanisë Apple, nuk gjendet Kosova, ndërsa paraqitej si pjesë e Serbisë.
Dua Lipa dhe Rita Ora ishin ndër të parat që reaguan, e që nxitën edhe debate të shumta shqiptaro-serbe në rrjete sociale.
Sidoqoftë, në një postim të fundit në rrjetin social Instagram, këngëtarja është shprehur krenare për prejardhjen e saj, ndërsa nuk ka lënë pa përmendur suksesin e artisteve shqiptare në botë.
“Këngëtaret shqiptare që e kanë djegur lojën tani, Rita Ora, Dua Lipa, Not Njomza, Era Istrefi, Bebe Rexha, dhe shumë e shumë të tjera. Krenare me prejardhjen time dhe pasionin që e përçojnë vajzat”, ka shkruar ajo në mbishkrim.
Ava ka qenë e etikuar edhe nga artistet e përmendura, të cilat tashmë janë bashkuar për të vetëdijesuar fansat e tyre. /Telegrafi/