Arsenali fiton thellë në derbi ndaj Chelseat, Xhaka shënoi supergol

Arsenali ka fituar në derbin e zjarrtë lokal ndaj Chelseat me rezultat të thellë 3-1 në kuadër të javës së 15-të në Ligën Premier.

Ekipi i Mikel Artetas i është kthyer fitores pas shtatë ndeshjeve në kampionat duke marrë një fitore të madhe ndaj rivalëve të tyre lokal, Chelseat.

Pjesa e parë e ndeshjes u karakterizua me lojë më të mirë të Topçinjve dhe me më shumë raste të krijuara, ndërsa arritën t’i shënojë edhe dy gola.

Lexo po ashtu Granit Xhaka ‘bombardon’ portën e Chelseat, shënon supergol nga goditja e dënimit

Goli i parë i ndeshjes erdhi pas 35-të minutave lojë dhe ishte Alexandre Lacazette, i cili shënoi nga pika e bardhë për 1-0.

Kur pritej që ekipet të shkonin në pushim, në skenë doli mesfushori shqiptar, Granit Xhaka (44’), i cili shënoi një supergol nga goditja e dënimit rreth 25 metra për 2-0.

Në pjesën e dytë u zhvillua lojë më e barabartë, por vendasit edhe pse ishin më konkret duke pasur raste më të pastra, shënuan vetëm një herë, po aq sa mysafirët.

Goli i parë në këtë pjesë erdhi në minutën e 56-të dhe ishte Bukayo Saka që shënoi gol të bukur për 3-0.

Arsenali pati raste të mira me anë të Lacazette (83’) dhe Mohamed Elneny (84’), por goditja e sulmuesit u prit nga portieri, ndërsa goditja e mesfushorit u ndal nga traversa.

Pas këtij goli, Chelsea arriti të dalë në një sulm të mirë dhe të shënojë me anë të Tammy Abraham (86’) për 3-1, por ky doli të ishte gol i fundit dhe i rezultatit përfundimtar, pasi Jorghinho dështoi të shënojë në shtesë nga penalltia, e cila iu prit nga Bernd Leno.

Pas kësaj fitore, Arsenali ngjitet në pozitën e 14-të me 17 pikë, ndërsa Chelsea zë vendin e gjashtë me 25 pikë.

Në ndeshjen e ardhshme, Topçinjtë udhëtojnë te Brighton, teksa Blutë e presin Aston Villan. /Telegrafi/