Mbretëria e Bashkuar ka konfirmuar se po furnizon Ukrainën me raketa me rreze të gjatë veprimi që i kërkoi për luftën kundër forcave pushtuese ruse.
Sipas mediave britanike, përcjell Telegrafi, bëhet fjalë për raketat “Storm Shadow” që kanë një rreze prej mbi 250 km (155 milje), sipas prodhuesit.
Në të kundërt, raketat Himars të furnizuara nga SHBA të përdorura nga Ukraina kanë vetëm një rreze veprimi prej rreth 80 km (50 milje).
Siç vlerëson mediumi në fjalë, armët do t’i japin Ukrainës aftësi të reja ndërsa ajo përgatitet për një kundërsulm kundër Rusisë.
Ato “shkarkohen” nga aeroplanët, kështu që distanca më e madhe do të thotë që pilotët ukrainas do të jenë në gjendje të qëndrojnë më larg nga vijat e frontit.
Njoftimi thuhet se u bë nga Sekretari i Mbrojtjes i Mbretërisë së Bashkuar, Ben Wallace dhe ky vendim vjen pas lutjeve të përsëritura nga Ukraina për më shumë armë nga Perëndimi. /Telegrafi/