Në ditën e parë të punës si ambasador i Shteteve të Bashkuara të Amerikës në Kosovë, Jeff Hovenier ka përkujtuar ish-presidentin e Kosovës, Ibrahim Rugova.
Bashkë me kryetaren e shtetit, Vjosa Osmani, ambasadori amerikan ka vendosur lule pranë shtatores së presidentit historik për të cilin ka thënë se duhet nderuar e përkujtuar.
“Mendoj se ishte e rëndësishme për mua në ditën e parë si ambasador i ri të shpreh këtë mirënjohje, këtë nderim duke e ditur atë çfarë ka përfaqësuar presidenti Rugova, kam pasur nderin që ta njoh presidenti Rugova gjatë procesit të Rambujesë dhe e di se për çka ka luftuar ai dhe mendoj që është e rëndësishme që edhe ta përkujtojmë, edhe ta nderojmë”, ka thënë ambasadori Hovenier.
E presidentja Vjosa Osmani ka thënë se ish-presidenti Rugova ka ndërtuar miqësi të cilat i kanë rezistuar kohës.
“Si themeltar i shtetit të Kosovës ai diti të ndërtojë jo vetëm hapat drejt shtetit tonë të pavarur dhe sovran por të ndërtojë miqësi të sinqerta, miqësi të forta të cilat i kanë rezistuar kohës dhe do të vazhdojnë të ujiten e lulëzojë edhe më tej nga ana e secilit prej nesh. Në nderim të këtij njeriut të madh të kombit tonë i cili dha shumë për Kosovën e pavarur dhe sovrane dhe për miqësitë që ne sot i gëzojmë, së bashku me ambasadorin e shteteve të Bashkuara të Amerikës deshëm që sot simbolikë e kësaj miqësie të fortë ta vendosim këtë kurorë këtu së bashku”, ka thënë presidentja Osmani. /kp/