Kryetari i Mitrovicës, Agim Bahtiri ka përshëndetur aksionin e Policisë së Kosovës të zhvilluar sot në veri të vendit lidhur me vrasjen e Oliver Ivanoviqit.
Bahtiri përmes një shkrimi të bërë në Facebook, ka shkruar se edhe pse gjendet në Bruksel ai po e përcjell me vëmendje situatën pas aksionit, siç ka shkruar ai ky aksion i kontribuon paqes dhe stabilitetit për të gjithë qytetarët pa dallim, transmeton Telegrafi.
Tutje ai ka shkruar se institucionet e Republikës së Kosovës dhe veçanërisht ato të sigurisë duhet të veprojnë në gjithë territorin e shtetit tonë, dhe që të gjithë janë të barabartë para ligjit.
Ndërkohë në aksionin e sotëm në veri, Policia e Kosovës ka arrestuar dy persona.
Aksioni ka përfshirë tri lokacione në veri të Mitrovicës ku janë kryer kontrolle dhe bastisje lidhur me veprat “Pjesëmarrje apo organizim i grupit kriminal” dhe “Keqpërdorim i pozitës zyrtare”.
Gjatë këtij operacioni ka arritur të konfiskojë 6 armë, prej tyre dy armë zyrtare dhe pajisje tjera elektronike./Telegrafi/
