Sulmuesi i Kosovës, Astrit Selmani, do ta vazhdojë karrierën në elitën e futbollit suedez te skuadra e IFK Goteborg, ku është huazuar nga izraelitët e Hapoel Be’er Sheva.
Ky është huazimi i tij i dytë nga klubi izraelit që posedon kartonin e tij, pasi vitin e shkuar ishte te Midtjylland në Danimarkë.
Me 15 golat e tij, Astrit Selmani kishte shpërthyer në Allsvenska, me fanellën e Varbergs Bois në vitin 2020.
💙| Välkommen till IFK Göteborg, Astrit Selmani!#ifkgbg
— IFK Göteborg (@IFKGoteborg) August 11, 2023
Një vit më pas ai fitoi Kupën e Suedisë me Hammarby, nga ku kishte fituar një transferim te klubi i madh izraelit Hapoel Be’er Sheva.
Sulmuesi 26-vjeçari është gati për aventurën e re te IFK Goteborg, ku kalon si huazim që zgjat deri në fund të sezonit, me opsion blerje në fund.
“E di se si është të luash për një klub të madh si Goteborgu dhe e di situatën sfiduese në këtë skuadër. Por është një sfidë e re dhe jam shumë i motivuar për t’u ballafaquar me të”, ka thënë Selmani për faqen zyrtare të klubit.
Selmani ka pesë paraqitje me Përfaqësuesen e Kosova dhe ka shënuar një gol. /Telegrafi/