Trajneri i Real Madridit, Zinedine Zidane ka shprehur kënaqësinë me fitoren e ekipit të tij ndaj Celta Vigos, fitore që i ngriti në pozitën e parë në La Liga.
Real Madridi ka fituar të shtunën mbrëma ndaj Celtas me rezultat 2-0 në ndeshjen e javës së 17-të.
Golat e Los Blancos u shënuan nga Lucas Vazquez dhe Marco Asensio, dhe kjo fitore e ka bërë të lumtur trajnerin Zidane.
“Celta Vigo ishte ekipi më në formë me të cilin jemi përballur. Kishim vështirësi, por kontrollonim ndeshjen”, ka thënë fillimisht Zidane pas ndeshjes.
“Ishte mirë nga minuta e parë deri në fund. Ne e interpretuam lojën shumë mirë duke shtypur lart, pa i lënë ata të luajnë”.
“Në fund, morëm tri pika shumë të rëndësishme për ne”.
“Ne luajtëm një lojë shumë serioze. Jam i lumtur për të gjithë”, përfundoi trajneri i Realit. /Telegrafi/