Policia e Kosovës ka njoftuar se sot ka gjobitur dy shoferë me nga 500 euro dhe ndalim të ngasjes së automjetit për 12 muaj, pasi të njëjtit kanë zhvilluar gara të shpejtësisë në Suharekë.
Policia thotë se “më 12/04/2024 në fshatin Shirokë, Suharekë patrullat policore të Stacionit Policor të Suharekës, Drejtoria Rajonale e Policisë në Prizren, kanë kapur në flagrancë dy shoferë të cilët ishin duke garuar me automjetet e tyre”.
“Ngasësit së bashku me vetura janë shoqëruar deri në stacionin policor të Suharekës dhe ndaj dy ngasësve janë shqiptuar gjoba për kundërvajtje me nga 500 euro dhe iu është shqiptuar edhe masa mbrojtëse – ndalim i ngasjes për 12 muaj, u janë shqiptuar nga 5 pikë negative gjithashtu”, thuhet në njoftim, transmeton Telegrafi.
Më tej në njoftim thuhet se “garat e shpejtësisë janë një aktivitetet i rrezikshëm dhe i jashtëligjshëm andaj Policia e Kosovës nuk do t’i tolerojë dhe do të veprojë kundër organizatorëve dhe pjesëmarrësve sa herë që të ketë informacion për organizim të tillë”. /Telegrafi/