Edon Zhegrova ëndërron që ta kualifikoj Kombëtaren e Kosovës në kampionatin evropian.
Sulmuesi prishtinas këtë ëndërr shpreson që ta bëjë realitet brenda këtij viti ku Kosova ndodhet në gjysmëfinalen e Ligës së Kombeve, Divizioni D.
Dardanët do të përballen me Maqedoninë në gjysmëfinale, ndërsa takimi tjetër është mes Bjellorusisë dhe Gjeorgjisë.
“Kemi bërë ndeshje shumë të mira në kualifikimet për Euro 2020, por në fund nuk ia dolëm të kualifikohemi pasi na mungoi pak fati”, deklaroi Zhegrova.
“Ëndrra ime e madhe është që ta kualifikoj Kosovën në një kampionat evropian dhe shpresoj që brenda këtij viti ta bëjmë realitet këtë ëndërr të gjithë shqiptarëve”, u shpreh Zhegrova për Telegrafin.
21-vjeçari deri më tani ka zhvilluar 17 ndeshje me Kosovën, duke shënuar edhe dy gola.
“Kam luajtur ndeshje të mira shumë, por shpresoj që të luaj më shumë me klubin që të jem në formë, pastaj trajneri vendos”.
“Qëllimi im është që gjithmonë ta ndihmojë Kosovën dhe shpresoj që të kaloj shifrën 100 ndeshjeve me Kombëtaren”, u shpreh Zhegrova.
Zhegrova momentalisht aktivizohet te Baseli, ku aktivizohen edhe futbollistë të tjerë shqiptarë të talentuar.
Prishtinasi ka thënë se i ka bërë thirrje futbollistëve të ri të Baselit që të zgjedhin Kosovën.
“Te Baseli por edhe në Zvicër ka shumë lojtarë të talentuar. Kam biseduar me ta dhe i kam kërkuar që ta zgjedhin Kosovën”.
“Normalisht ju kam sugjeruar që të bisedojnë me familjet e tyre, por nëse ia do zemra do të ishte mirë të vinin te Kosova”, tha për Telegrafin, Edon Zhegrova.
Orges Bunjaku, Kemal Ademi, Tician Tushi, Jozef Pukaj, Elis Isufi, Landrit Ejupi apo Lirik Vishi janë disa nga lojtarët e Baselit të cilët ende nuk luajnë për ndonjërën nga Kombëtaret A. /Telegrafi/