Presidenti ukrainas Volodymyr Zelensky tha të dielën se vendi i tij kishte nevojë për garanci sigurie nga NATO dhe më shumë armë për t’u mbrojtur përpara çdo bisedimi me Rusinë.
Ai i bëri komentet pas takimit me kreun e ri të diplomacisë së BE-së, Kaja Kallas dhe shefin e Këshillit të BE-së, Antonio Costa, të cilët po vizitonin Kievin si një shfaqje mbështetjeje në ditën e tyre të parë në detyrë, përcjell Telegrafi.
“Një ftesë për Ukrainën për t’u bashkuar me NATO-n është një gjë e nevojshme për mbijetesën tonë”, ka thënë Zelensky në një konferencë shtypi me Costa.
Ukraina përballet me një dimër të vështirë përpara, me Rusinë që lëshon sulme shkatërruese kundër rrjetit të saj të energjisë.
Pyetjet po qarkullojnë gjithashtu rreth të ardhmes së mbështetjes së SHBA-së sapo Donald Trump të marrë presidencën në janar, me frikën se mund ta detyrojë Kievin të bëjë lëshime të dhimbshme në ndjekje të një marrëveshjeje të shpejtë paqeje.
Zelensky tha se vendi i tij duhet të ishte në një “pozicion të fortë” përpara çdo bisedimi me Kremlinin, duke bërë thirrje për “hapa përpara me NATO-n” dhe një “numër të mirë” armësh për distanca të gjata për t’u mbrojtur.
“Vetëm kur i kemi të gjitha këto dhe jemi të fortë, pas kësaj, ne duhet të bëjmë agjendën shumë të rëndësishme të takimit me njërin ose tjetrin nga vrasësit”, tha udhëheqësi ukrainas, duke shtuar se BE dhe NATO duhet të përfshihen në çdo negociatë.
Ndërsa Costa tha se Bashkimi Evropian do t’i japë Ukrainës mbështetjen e saj “të palëkundur”.
“Ne kemi qëndruar me ju që nga dita e parë e kësaj lufte agresioni dhe ju mund të mbështeteni tek ne që të vazhdojmë të qëndrojmë me ju”, i ka thënë ai Zelenskyt.
Ekipi i ri drejtues i Bashkimit Evropian është i prirur të tregojë se mbetet i vendosur në mbështetjen për Kievin në një moment të rrezikshëm për Ukrainën gati tre vjet në luftën e saj kundër pushtimit rus. /Telegrafi/