Sipas një raporti të medias amerikane, Donald Trump do të bëjë presion ndaj Ukrainës që të heqë dorë nga territori nëse ai rizgjidhet president i SHBA-së.
Propozimi i tij është që Ukraina duhet t’i dorëzojë Rusisë Krimenë dhe rajonin kufitar të Donbasit, tha Washington Post, shkruan Sky News, përcjell Telegrafi.
Gazeta citoi “njerëz që e diskutuan atë me Trump ose këshilltarët e tij dhe folën në kushte anonimiteti”.
Por kjo politikë do të “shpërblejë Vladimir Putinin” dhe “të falë shkeljen e kufijve të njohur ndërkombëtarisht me forcë”, kanë paralajmëruar ekspertët e politikës së jashtme, shtoi gazeta.
Ndryshe, Trump është “mburrur shpesh” se ai mund të “negociojë një marrëveshje paqeje midis Rusisë dhe Ukrainës brenda 24 orëve nëse zgjidhet, madje edhe para se të merrte detyrën”, tha gazeta.
Kjo vlerësohet se do të ishte një ndryshim i madh në politikën e ndjekur nga presidenti Joe Biden, i cili i ka ofruar Ukrainës ndihmë ushtarake.
Por një paketë tjetër, e madhe e SHBA-së për Ukrainën është mbajtur në Dhomën e Përfaqësuesve prej javësh.
Përplasjet e brendshme midis republikanëve që kontrollojnë Dhomën e Përfaqësuesve dhe një kërcënim për të rrëzuar kryetarin Mike Johnson, mund të shkaktojnë vonesa të mëtejshme, ka raportuar Reuters.
Republikanët e linjës së ashpër po kërkojnë dispozita të sigurisë kufitare dhe shkurtime të shpenzimeve për të kompensuar ndihmën për aleatët e SHBA-së. /Telegrafi/