Sipas mediave ukrainase, Volodymyr Zelensky është takuar me të dërguarin e SHBA-së për luftën, Keith Kellogg.
Por një zyrtar i Kievit ka shtuar se një konferencë e planifikuar për shtyp është anuluar me kërkesë të Uashingtonit, shkruan Sky News, përcjell Telegrafi.
Aty pritej të flisnin të dy, Kellogg dhe Zelensky.
Udhëtimi i Kellogg në Kiev ka përkuar me një përplasje publike midis Donald Trump dhe Zelensky, ku i pari e etiketon ukrainasin si “diktator” dhe kërkon që ai të lëvizë “shpejt” përpara se të humbasë vendin e tij.
Kjo ka thelluar shqetësimet se SHBA mund ta detyrojë Ukrainën në lëshime si pjesë e një marrëveshjeje për t’i dhënë fund luftës, me diskutimet midis Uashingtonit dhe Moskës që nisën dy ditë më parë pa Evropën e Kievin.
Ndërkohë presidenti i Këshillit Evropian, António Costa ka konfirmuar se ai dhe presidentja e Komisionit Evropian Ursula von der Leyen do të vizitojnë kryeqytetin ukrainas më 24 shkurt, në përvjetorin e tretë të fillimit të agresionit të plotë të Rusisë kundër Ukrainës.
“E hëna, 24 shkurt, shënon përvjetorin e tretë të pushtimit rus të Ukrainës në shkallë të gjerë. Kam vendosur të jem në Kiev për atë rast, me Ursula von der Leyen, për të riafirmuar mbështetjen tonë për popullin heroik ukrainas dhe presidentin e zgjedhur në mënyrë demokratike Volodymyr Zelensky”, ka shkruar Costa, përcjell Telegrafi.
Më 24 shkurt, Ukraina po përgatit një takim të liderëve të vendeve partnere në Kiev për të diskutuar paqen, garancitë e sigurisë dhe të ardhmen e sigurisë kolektive. /Telegrafi/