Presidenti ukrainas Volodymyr Zelensky tha sot se sanksionet e reja të vendosura ndaj Moskës nga Bashkimi Evropian, do të “ulin me të vërtetë” bazën ekonomike të Rusisë për luftë kundër vendit të tij.
Sot, BE-ja miratoi paketën e 12-të të sanksioneve kundër Rusisë, e cila përfshin kryesisht ndalimin e importit të diamanteve ruse në Bashkimin Evropian, transmeton Telegrafi.
Vendet e BE-së e konfirmuan atë paketë të premten, në margjinat e samitit evropian, por ajo nuk mundi të miratohej për shkak të rezervave të Austrisë, të cilat më pas janë hequr.
Është paketa e 12-të që nga fillimi i pushtimit rus të Ukrainës më 24 shkurt 2022, e presidentja e KE-së, Ursula von der Leyen, tha se Bashkimi vazhdon të mbështesë Ukrainën.
“E gjithë kjo me të vërtetë do të ndihmojë në reduktimin e bazës ekonomike të luftës”, tha Zelensky në fjalimin e tij.
“Ne do të vazhdojmë të punojmë me partnerët tanë për të siguruar që sanksionet e vendosura nga Evropa të funksionojnë globalisht”, shtoi ai. /Telegrafi/
