Presidenti i Ukrainës, Volodymyr Zelensky, tha në një intervistë për ABC News se mund të ketë një rebelim të ri në Rusi dhe se ka njerëz që do ta mbështesin atë.
“Ka një shenjë se mund të ketë një kryengritje tjetër në Rusi, një revolucion. Përveç kësaj, ka shumë njerëz që mund të mbështesin një kryengritje të tillë”, tha Zelensky, duke komentuar kryengritjen e mercenarëve rusë nga grupi Wagner që ndodhi në 23 dhe 24 qershor në Rusi.
“Putini nuk ka forcë ushtarake brenda Rusisë dhe popullsia civile ruse nuk është e mbrojtur”, shtoi ai, transmeton Telegrafi.
Zelensky pretendon se qëllimi kryesor i shefit të Wagner, Yevgeny Prigozhin, ishte të bëhej një “figurë politike” në Rusi dhe se ai ia doli.
Forcat e Wagner erdhën 200 kilometra larg Moskës, përpara se Prigozhin të braktiste papritur rebelimin.
“Pse ndaloi? Epo, nuk e di me siguri”, tha Zelensky.
Pas përfundimit të rebelimit, trupave të Wagnerit iu tha të nënshkruanin kontrata me ushtrinë ruse, të ktheheshin te familjet e tyre ose të pranonin ofertën e Lukashenkos për të shkuar në Bjellorusi, ku, sipas pamjeve satelitore, janë ndërtuar baza të reja ushtarake.
Por Zelensky thotë se të dhënat e disponueshme të kundërzbulimit sugjerojnë se trupat e Wagner nuk do të sulmojnë Ukrainën nga veriu. /Telegrafi/
