Presidenti i Ukrainës, Volodymyr Zelensky, ka kritikuar vizitën e ekspertëve OKB-së në termocentralin më të madh bërthamor në Evropë.
Ai është i mërzitur me mbikëqyrësin bërthamor që inspekton objektin e Zaporizhzhia, Agjencia Ndërkombëtare e Energjisë Atomike (IAEA), i cili nuk ka bërë ende thirrje për çmilitarizimin e vendit, i cili është pushtuar nga trupat ruse që në fillim të luftës gjashtëmujore.
Zelensky gjithashtu qortoi Rusinë për pengimin e gazetarëve që të shoqëronin IAEA në vizitën e saj në uzinë.
“Gjëja kryesore që duhet të ndodhë është çmilitarizimi i territorit të uzinës”, tha Zelensky. “Ky është pikërisht qëllimi i përpjekjeve ukrainase dhe ndërkombëtare. Dhe është keq që ne nuk kemi dëgjuar ende thirrjet e duhura nga IAEA. Edhe pse biseduam për këtë me zotin Grossi në takimin tonë në Kiev. Ky ishte çelësi – çelësi – pika e sigurisë e marrëveshjeve tona, u tha qartë: çmilitarizimi dhe kontrolli i plotë nga specialistët bërthamorë ukrainas”.
“Kur u takuam me (drejtorin e përgjithshëm të IAEA, Rafael) Grossi dhe anëtarët e misionit në Kiev, ne ramë dakord që gazetarë të pavarur […] do të shoqëronin misionin që bota të shohë të vërtetën dhe atë që po ndodh realisht. Fatkeqësisht, kjo nuk është bërë edhe pse ishte premtuar. Fatkeqësisht, pushtuesit nuk i lanë gazetarët në territor, por organizuan një turmë të propaganduesve të tyre. Për fat të keq, përfaqësuesit e IAEA nuk i mbrojtën përfaqësuesit e mediave të pavarura”, tha ai.
Delegacioni i ekspertëve prej 14 anëtarësh nga IAEA mbërriti në Zaporizhzhia të enjten pas muajsh negociatash për të hyrë brenda. Fabrika është pushtuar nga forcat ruse, por drejtohet nga inxhinierë ukrainas.
Ukraina pretendon se Rusia po e përdor atë si një mburojë për të nisur sulmet, ndërsa Moska e akuzon Ukrainën për gjuajtje të pamatur në zonë. /Telegrafi/