Volodymyr Zelensky ka thënë se sulmi i së hënës në Kryvyi Rih dëshmoi edhe një herë se ushtria ukrainase “duhet të ketë mjaftueshëm armë me rreze të gjatë, mjete të mjaftueshme për të mposhtur terroristët”.
Në video-fjalimin e mbrëmjes, presidenti ukrainas zbuloi se raketat që goditën qytetin ishin lëshuar “nga territori i Krimesë së pushtuar nga zona e Dzhankoyt”.
“Presioni i sanksioneve botërore kundër Rusisë meriton të rritet ndjeshëm”, shtoi ai, “ky është terrorizëm që askush në botë nuk do ta quajë ndryshe”.
Ai konfirmoi se gjashtë persona kishin vdekur, duke përfshirë një vajzë 10-vjeçare të quajtur Daria.
“Nëna e saj vdiq me të. Quhej Natalia. Një familje e zakonshme në një qytet të zakonshëm, jetët e së cilës u shkatërruan nga vrasësit rusë. Ngushëllimet e mia për të gjithë ata që humbën të dashurit e tyre”, tha lideri ukrainas.
Zelensky tha se rreth 69 persona u plagosën në sulm ndërsa “dhjetëra” morën trajtime mjekësore në spitale.
Ndryshe, operacioni i kërkim/shpëtimit në Kryvyi Rih, i cili ndodh të ishte vendlindja e Zelenskyt, përfundoi gjatë mbrëmjes së sotme. /Telegrafi/